Бүртгүүлэх

• «Платформ» — Match Point вэб болон гар утасны хэрэглээний программ, түүний бүх үйлчилгээ.
• «Хэрэглэгч» — Платформд бүртгүүлсэн, үйлчилгээг ашиглаж буй аливаа этгээд (тоглогч, шүүгч, зохион байгуулагч, үзэгч).
• «Бүртгэл» — Хэрэглэгчийн овог, нэр, утасны дугаараар үүсгэсэн хувийн данс.
• «Контент» — Платформ дээрх тэмцээн, тоглолт, оноо, Эрэмбэ, мэдээ зэрэг бүх мэдээлэл.

Платформд бүртгүүлэхийн тулд та овог, нэр, утасны дугаараа үнэн зөв оруулж, утсаар ирэх SMS баталгаажуулалтыг хийнэ. Та дараах нөхцөлийг хангасан байх ёстой:

• Өөрийн жинхэнэ, бодит мэдээллийг оруулах. Бусдын нэр, утасны дугаараар бүртгүүлэхийг хориглоно.
• Нэг утасны дугаараар зөвхөн нэг бүртгэл үүсгэх. Давхардсан бүртгэлийг Платформ цуцлах эрхтэй.
• 18 нас хүрээгүй хэрэглэгч бүртгүүлснээр эцэг эх, асран хамгаалагчийн зөвшөөрөл авсан гэж үзнэ. Платформ нь тухайн зөвшөөрлийг шалгах нэмэлт баримт шаардах эрхтэй.
• Нэвтрэх эрхээ бусдад дамжуулахгүй байх. Бүртгэлээр хийгдсэн бүх үйлдлийн хариуцлагыг Хэрэглэгч өөрөө хүлээнэ.

Хэрэглэгч дараах эрхтэй:

• Тэмцээн, сургалтад бүртгүүлэх, оролцох.
• Өөрийн тоглолтын оноо, ялалт/ялагдал, Эрэмбэ, статистикийг харах.
• Хувийн мэдээллээ шинэчлэх, бүртгэлээ устгуулах хүсэлт гаргах.

Хэрэглэгч дараах үүрэгтэй:

• Тэмцээний дүрэм журам, шүүгчийн шийдвэрийг хүндэтгэн дагаж мөрдөх.
• Бусад хэрэглэгч, шүүгч, зохион байгуулагчдыг доромжлох, заналхийлэх, худал мэдээлэл тараахгүй байх.
• Платформын аюулгүй байдлыг алдагдуулах, системд зөвшөөрөлгүй халдах, автомат хэрэгслээр мэдээлэл татахыг оролдохгүй байх.

• Тэмцээн, сургалтын бүртгэлийг зохион байгуулагч/админ баталгаажуулснаар оролцоо хүчин төгөлдөр болно.
• Тэмцээний хураамж төлбөртэй тэмцээний хувьд төлбөрийг заасан хугацаанд төлнө. Төлбөрийн нөхцөл, буцаалтын журам нь тухайн тэмцээний зарласан нөхцөлөөр зохицуулагдана.
• Бүртгүүлсэн тоглогч оролцохгүй болсон тохиолдолд татгалзах хүсэлтээ урьдчилан гаргана. Шалтгаангүй тоглолтоос зайлсхийсэн (walkover) тохиолдолд эсрэг талд ялалт олгож болно.
• Тоглолтын эцсийн оноо, үр дүнг шүүгч баталгаажуулна. Эрэмбэ, статистик нь баталгаажсан тоглолтын дүнгээс автоматаар тооцогдоно.

Платформын нэр, лого, дизайн, программ хангамж, бүтэц нь Match Point-д хамаарах оюуны өмч мөн. Хэрэглэгч эдгээрийг зохиогчийн зөвшөөрөлгүйгээр хуулбарлах, тараах, арилжааны зорилгоор ашиглахыг хориглоно. Хэрэглэгчийн оруулсан мэдээлэл (тоглолтын дүн, профайл зэрэг) нь Платформ дээр нийтэд харагдахаар нийтлэгдэж болохыг Хэрэглэгч зөвшөөрнө.

Бид таны овог, нэр, утасны дугаарыг зөвхөн бүртгэл үүсгэх, баталгаажуулах, үйлчилгээ үзүүлэх зорилгоор цуглуулж, боловсруулна. Таны мэдээллийг:

• Гуравдагч этгээдэд арилжаалах, худалдахгүй.
• Хууль ёсны шаардлага, эрх бүхий байгууллагын албан ёсны хүсэлтээс бусад тохиолдолд задруулахгүй.
• Зөвхөн тэмцээний явц, оноо, мэдэгдэл хүргэх зэрэг үйлчилгээний хүрээнд ашиглана.

Тоглогчийн нэр, Эрэмбэ, тоглолтын дүн зэрэг тэмцээний мэдээлэл нь шударга өрсөлдөөний зорилгоор нийтэд ил харагдана.

• Платформ нь техникийн саатал, засвар, сүлжээний доголдол зэргээс үүдэн үйлчилгээ түр тасалдахыг бид боломжийн хэрээр багасгахыг хичээх боловч тасралтгүй ажиллагааг бүрэн баталгаажуулахгүй.
• Тэмцээн, сургалтын үеэр гарсан бие махбодын гэмтэл, эд хөрөнгийн хохирлыг Платформ хариуцахгүй. Энэ нь зохион байгуулагч болон оролцогчдын хооронд зохицуулагдана.
• Хэрэглэгчийн оруулсан буруу мэдээллээс үүдэх үр дагаврыг Хэрэглэгч өөрөө хариуцна.

Хэрэглэгч энэхүү Нөхцөлийг зөрчсөн, бусдын эрхийг хохироосон, эсхүл Платформын хэвийн ажиллагааг алдагдуулсан тохиолдолд бид урьдчилан мэдэгдэлгүйгээр бүртгэлийг түдгэлзүүлэх, цуцлах эрхтэй. Хэрэглэгч хүссэн үедээ бүртгэлээ устгуулах хүсэлт гаргаж болно.

Бид энэхүү Нөхцөлийг шаардлагатай үед шинэчлэх эрхтэй. Өөрчлөлт орсон тохиолдолд «Сүүлд шинэчилсэн» огноог шинэчилнэ. Шинэчилсэн нөхцөл нийтлэгдсэний дараа Платформыг үргэлжлүүлэн ашигласан нь өөрчлөлтийг хүлээн зөвшөөрсөнд тооцогдоно.

• Платформоор дамжуулан тэмцээн, сургалт болон бусад үйлчилгээнд бүртгүүлэх үед үйлчилгээний шимтгэл ногдуулж болно.
• Төлбөр хийхээс өмнө нийт төлбөрийн дүн, үүнд багтсан үйлчилгээний шимтгэлийг хэрэглэгчид харуулна.
• Үйлчилгээний шимтгэлийн хэмжээ нь үйлчилгээний төрөл, төлбөрийн арга, зохион байгуулагчийн нөхцөлөөс хамааран өөр байж болох бөгөөд тухайн үеийн хүчин төгөлдөр тарифын дагуу тооцогдоно.
• Хууль болон тухайн тэмцээний нөхцөлд өөрөөр заагаагүй бол төлөгдсөн үйлчилгээний шимтгэлийг буцаахгүй.
• Платформ нь ирээдүйд шинэ үйлчилгээ, захиалгат бүтээгдэхүүн, дижитал үйлчилгээ, статистик, рейтинг, сургалт болон бусад нэмэлт үйлчилгээнд төлбөр, шимтгэл тогтоох эрхтэй бөгөөд ийм нөхцөлийг үйлчилгээ ашиглахаас өмнө хэрэглэгчид мэдээлнэ.

• Платформоор дамжуулан зохион байгуулагдаж буй тэмцээн, сургалт болон бусад арга хэмжээний хураамж, төлбөрийн хэмжээ, нөхцөл болон холбогдох мэдээллийн үнэн зөв байдлыг тухайн тэмцээнийг зохион байгуулж буй мэргэжлийн холбоо, клуб эсхүл зохион байгуулагч бүрэн хариуцна.
• Платформ нь уг мэдээллийг нийтлэх, дамжуулах, бүртгэл болон төлбөрийн үйл ажиллагааг техникийн болон зохион байгуулалтын түвшинд дэмжих үүрэгтэй бөгөөд мэдээллийн агуулгын үнэн зөв, өөрчлөлт, алдаанаас үүдэх шууд хариуцлагыг хүлээхгүй.
• Гэсэн хэдий ч Платформ нь мэдээллийн зөрчил, алдаа илэрсэн тохиолдолд засварлах, шинэчлэх, эсхүл түр түдгэлзүүлэх арга хэмжээ авах эрхтэй.
• Буцаан олголтын бүх шийдвэрийг тухайн зохион байгуулагчийн албан ёсны тэмцээний дүрэмд үндэслэнэ.

Энэхүү Нөхцөлтэй холбоотой асуулт, гомдол, саналаа Платформын зохион байгуулагч/админд хандаж шийдвэрлүүлнэ үү. Үйлчилгээний нөхцөлд тусгагдаагүй харилцааг Монгол Улсын холбогдох хууль тогтоомжийн дагуу зохицуулна.

Платформд бүртгүүлэх, ашиглах явцад дараах мэдээллийг цуглуулна:

• Бүртгэлийн үндсэн мэдээлэл — овог, нэр, утасны дугаар (нэвтрэх, SMS баталгаажуулах зорилгоор).
• Регистрийн дугаар, төрсөн огноо — тоглогчийн бодит нас, өрсөлдөх ангиллыг тодорхойлох зорилгоор (гадаад улсын иргэний хувьд шаардахгүй).
• Профайл зураг, бичиг баримтын зураг — үнэмлэх/гэрчилгээ/паспортын зураг зөвхөн бүртгэл баталгаажуулах зорилгоор хадгалагдана; профайл зураг бол нийтэд харагдана.
• Тэмцээн, тоглолтын мэдээлэл — бүртгэл, оноо, тоглолтын дүн, Эрэмбэ, статистик.
• Төлбөрийн мэдээлэл — тэмцээн/сургалтын хураамж төлөх QR/гүйлгээний лавлагаа дугаар. Платформ таны банкны карт, дансны нууц мэдээллийг хадгалдаггүй — төлбөрийг итгэмжлэгдсэн төлбөрийн үйлчилгээ үзүүлэгч боловсруулна.
• Төхөөрөмжийн push token — мэдэгдэл (notification) хүргэх зорилгоор, зөвхөн зөвшөөрсөн тохиолдолд.
• Холбогдсон нэвтрэх аргууд — хэрэглэгч сонголтоор Facebook акаунтаа холбосон тохиолдолд түүний provider ID-г хадгална (нэвтрэлтийг хурдасгах зорилгоор, зарлагдаагүй мэдээлэлд хандахгүй).

• Таны Платформ дээр өөрөө оруулсан бүртгэл, тоглолтын мэдээлэл.
• Утасны дугаарыг итгэмжлэгдсэн SMS баталгаажуулах үйлчилгээгээр илгээсэн кодоор баталгаажуулна.
• Тэмцээн, сургалтын шүүгч/зохион байгуулагчийн оруулсан тоглолтын дүн, оноо.
• Та сонгосон тохиолдолд Facebook-оос нэр, нэвтрэлтийн ID зэрэг зөвхөн шаардлагатай хамгийн бага мэдээллийг авна.

• Хэрэглэгчийг баталгаажуулах, бүртгэл үүсгэх, нэвтрүүлэх.
• Тэмцээн, сургалтад бүртгэх, оролцоог зохион байгуулах.
• Тоглолтын дүн, Эрэмбэ, статистикийг тооцоолж харуулах.
• Төлбөр төлөлтийг баталгаажуулах.
• Мэдэгдэл (тоглолт эхлэх, үр дүн, бүртгэл баталгаажсан гэх мэт) илгээх.
• Платформын аюулгүй байдал, давхар бүртгэл, хууран мэхлэлтээс сэргийлэх.

Шударга өрсөлдөөн, тэмцээний ил тод байдлыг хангах үүднээс дараах мэдээлэл Платформ дээр НИЙТЭД харагдана: тоглогчийн нэр, профайл зураг, Эрэмбэ, медаль, тоглолтын дүн, тэмцээний үр дүн. Регистрийн дугаар, төрсөн огноо, утасны дугаар, бичиг баримтын зураг, төлбөрийн дэлгэрэнгүй мэдээлэл НИЙТЭД ХАРАГДАХГҮЙ — зөвхөн эрх бүхий админд хязгаарлагдмал байдлаар харагдана.

• Мэдээлэл найдвартай цахим өгөгдлийн санд шифрлэгдсэн холболтоор дамжуулагдаж хадгалагдана.
• Регистрийн дугаар, бичиг баримтын зураг зэрэг мэдрэмтгий мэдээлэлд зөвхөн эрх бүхий админ хандах эрхийн дүрмээр хязгаарлагдсан.
• Таны бүртгэл идэвхтэй байх, эсхүл хуулиар шаардагдах хугацаанд мэдээллийг хадгална. Бүртгэл устгуулах хүсэлт гаргасан тохиолдолд боломжит хамгийн богино хугацаанд устгана.

• Өөрийн бүртгэлтэй мэдээллээ харах, шинэчлэх.
• Холбогдсон Facebook акаунтаа хүссэн үедээ салгах.
• Бүртгэлээ болон холбогдох хувийн мэдээллээ устгуулах хүсэлт гаргах (Профайл хэсэг эсвэл зохион байгуулагч/админаар дамжуулан).
• Мэдэгдэл (push notification) хүлээн авах эсэхээ өөрөө удирдах.

18 нас хүрээгүй хэрэглэгчийн мэдээллийг эцэг эх, асран хамгаалагчийн зөвшөөрлөөр цуглуулна (Үйлчилгээний нөхцөл-ийн 2-р зүйлтэй адил). Эцэг эх, асран хамгаалагч хүүхдийнхээ мэдээллийг харах, устгуулах хүсэлт гаргах эрхтэй.

Бид энэхүү Нууцлалын бодлогыг шаардлагатай үед шинэчлэх эрхтэй. Өөрчлөлт орсон тохиолдолд «Сүүлд шинэчилсэн» огноог шинэчилнэ. Шинэчилсэн бодлого нийтлэгдсэний дараа Платформыг үргэлжлүүлэн ашигласан нь өөрчлөлтийг хүлээн зөвшөөрсөнд тооцогдоно.

Хувийн мэдээллийн нууцлалтай холбоотой асуулт, хүсэлтээ Платформын зохион байгуулагч/админд хандаж шийдвэрлүүлнэ үү.